Негативни ефекти од антибиотиците

Никој на светот не е совршен, па таков е и случајот со лековите. Односно, не постои идеален лек, туку сите лекови, вклучувајќи ги и антибиотиците, имаат свои позитивни и негативни страни.

Пеницилини. Ампицилинот, амоксицилинот и оспенот може да дадат алергиска реакција, која може да биде проследена и со анафилактичен шок, при што може да дојде и до гушење на самиот пациент.

Цефалоспорини. Овие лекови (на пример, цефалексинот и панцефот) имаат слична хемиска структура како пеницилините, па токму поради таа причина и тие може да дадат алергиски реакции.

Тетрациклини. Вибрамицинот кај мали деца може да предизвика потемнување на забите, како и неправилно растење на коските. Кај постари луѓе пак, може да предизвика оштетување на црниот дроб.

Аминогликозиди. Овие лекови може да дадат три типа на токсичност: ототоксичност (оштетување на слушниот нерв), нефротоксчност (оштетување на нефроните од бубрезите) и нервно – мускулна блокада, поради што се комплетно контраиндицирани кај Myastenia gravis.

Полипептиди. Овие антибиотици покажуваат висок степен на токсичност, особено ренална токсичност, поради што нивната употреба е лимитирана.

Макролиди. Азитромицинот може да предизвика нарушување на гастроинтестиналниот тракт, од типот на гадење, повраќање и слично.