Поим и значење на антибиотиците

Општо познато е дека во премин на годишните времиња, особено во есенскиот и зимскиот период, бројот на настинки и вируси значително расте. Како резултат на тоа, неопходна е и посетата на стручно лице, односно посета на лекар. Прв избор на лекарите се секако антибиотиците. Антибиотиците претставуваат продукти на метаболизмот на нижите растителни видови, особено некои сапрофитни бактерии и габи. Како такви, антибиотиците може да дејствуваат бактериостатски или бактерицидно. Интересно е тоа што антибиотиците може да се добиваат и по синтетски, односно полусинтетски пат.

Денес, антибиотиците најмногу се употребуваат при лекување на голем број на заразни болести, па од тука, истите треба да се користат само кога се навистина неопходни. Имено, постојат голем број на болести, кои може да се излекуваат без употреба на антибиотици. Затоа, не треба за обична главоболка или црвено грло веднаш да се зема антибиотик, туку понекогаш и една шолја чај може да биде доволна за да се чувствуваме подобро. Потрошувачката на лекови и покрај намалениот економски стандард е постојано во пораст. Затоа постојано се инсистира на рационална примена, а не рестрикција на употребата на лекови и тоа посебно на антибиотиците. Но, доколку немаме друг избор освен антибиотици, тогаш треба да го знаеме начинот на кој истите се употребуваат и да се стремиме кон нивна рационална примена. За таа цел, неопходно е да имаме познавање од областа на:

1. Механизмот на дејство на антибиотиците;
2. Фармакокинетика и фармакодинамика на антибиотиците;
3. Токсичност од антибиотиците;
4. Интеракции и несакани дејства од антибиотиците;
5. Резистентност на бактериите кон антибиотиците;
6. Тестови на осетливост кон антибиотиците;
7. Место на инфекција од антибиотиците.